| |
O Crecemento e a Expansión da Lonxa
Lonxa ata 1991. Na actualidade oficina de
Portos de Galicia. |
A intensa actividade marítimo-pesqueira que levou da man ó desenvolvemento
urbán e social de Riveira desde finais do s. XVIII de maneira case
ininterrumpida tivo un dos seus momentos culminantes en 1916. O primeiro día
deste ano inaugurouse a Lonxa de Subhastas de Pescado de Santa Eugenia de
Riveira, pola que tanto se loitara dende ben tempo atrás. Na zona coñecida como
Laxes do Castelo, onde agora se atopa a Praza de Abastos, ergueuse un pequeno
edificio, berce e primeiro paso da que no futuro chegaría a ser unha das lonxas
máis competitivas e de maior diversidade biolóxica de toda Galicia.
A evolución crecente do sector obrigou á construcción dunha nova sede: o
edificio que ocupou ata o ano 2000 o que agora é un aparcadoiro xusto en fronte
do recinto da Lonxa actual, a carón da Praza de Abastos e diante de varios
locais de ocio emblemáticos da vida mariñeira da cidade. Este proxecro da Lonxa
de Contratación de Pescado acometeuse entre o 1942 e 1943, previa concesión
marítima e segundo os planos encargados ó arquitecto coruñés Santiago Rey
Pedreira. A bonanza económica deixábase sentir, e o volume de peixe e diñeiro
aumentaba acompasado cunha demografía que ancheaba a súa pirámide de poboación. O seguinte chanzo
acadouse, xa na etapa democrática, coa edificación da nova lonxa nas instalacións que agora albergan a
delegación de Portos de Galicia, dentro da superficie portuaria. Finalmente, en
1991 chegouse á ubicación actual. Unha enorme nave duns 4000 metros cadrados de
superficie, financiada por Portos de Galicia e de titularidade municipal, acolle
agora a actividade diaria de centos de persoas que se sacrifican a cotío para
ofrecérennos as riquezas mariñas. Só por lanzar algún dato que refrende esta
expansión crecente, malia as sempre presentes fluctuacións, desde o ano 1985 ata
o 2002, o volume de vendas producido na Lonxa riveirense ronda os 400 millóns de
euros.
Subir
 |
